ហេតុអ្វីបានជា​មានដំណឹង​ល្អ​ក្លែងក្លាយ​ និង​ព្រះ​គ្រីស្ទ​ក្លែងក្លាយ​ច្រើន​ដូច្នេះ? គឺ​មូលហេតុ​ដូចគ្នា​ដែល​មាន​ក្រដាស​ប្រាក់​១០០ដុល្លារ​ក្លែងក្លាយ​ច្រើន​ដែរ៖ ពីព្រោះ​មាន​តំលៃ​ខ្ពស់​ណាស់! អារក្ស​សាតាំង​ដឹង​ថា​ ដំណឹង​ល្អ​របស់​ព្រះ​គ្រីស្ទ​ គឺជា​របស់​ដ៏​មាន​តម្លៃ​បំផុត​នៅ​ក្នុង​ពិភពលោក។ ដំណឹងល្អ​គឺជា ​«ព្រះចេស្តា​នៃ​ព្រះ សំរាប់​នឹង​ជួយ​សង្គ្រោះ​ដល់​អស់​អ្នក​ណា​ដែល​ជឿ» (រ៉ូម ១ៈ១៦) ហើយ​អារក្ស​សាតាំង​ស្អប់​ដំណឹងល្អ​នោះ​ដោយ​អស់​ពីចិត្ត។ ដូច្នេះ​គ្រប់​ទីកន្លែង​ដែល​ដំណឹង​ល្អ​ទទួល​បាន​ជោគជ័យ​ សាតាំង​ដឹកនាំ​គ្រូ​ក្លែងក្លាយ ​ឲ្យ​បង្កើត​ដំណឹង​ល្អ​ក្លែងក្លាយ​ និង​ព្រះ​គ្រីស្ទ​ក្លែងក្លាយ។
ហេតុនេះ​ហើយ​បានជា​មាន​ក្រុម​ខុសឆ្គង​ជាច្រើន ​ដែល​មក​ពី​ អាមេរិក​ កូរ៉េ ចិន និង​អាហ្វ្រិក។ តំបន់​ទាំងនោះ​ គឺជា​កន្លែង​ដែល​ដំណឹង​ល្អ​បាន​ទទួលជោគជ័យ​យ៉ាង​ខ្លាំង។ ក្រុម​ខុសឆ្គង​ចូលចិត្ត​បញ្ឆោត​គ្រីស្ទបរិស័ទ​ថ្មី។ តើ​ពួកគេ​រក​គ្រីស្ទ​បរិស័ទ​ថ្មី​នៅ​ឯណា? គឺ​នៅ​កន្លែងណា​ដែល​ដំណឹង​ល្អ​កំពុង​រីកចម្រើន​ឡើង។ កាលពី​សាមសិប​ឆ្នាំមុន​ ប្រទេស​កម្ពុជា​ មិន​សូវ​មាន​ក្រុម​ខុសឆ្គង​ទេ ​ពីព្រោះ​មិនសូវ​មាន​គ្រីស្ទបរិស័ទ​ថ្មី​សម្រាប់​ក្រុម​ខុសឆ្គង​លួច​ឡើយ។ ការ​លួច​សមាជិក​ក្រុមជំនុំ​ គឺជា​មធ្យោបាយ​ចម្បង​ដែល​ក្រុម​ខុសឆ្គង​លូតលាស់។ ប៉ុន្តែ​បច្ចុប្បន្ន​នេះ​ មាន​គ្រីស្ទ​បរិស័ទ​រាប់​សែន​នាក់ ​និង​ក្រុមជំនុំ​រាប់​ពាន់ ដូច្នេះ​ក្រុម​ខុសឆ្គង​បាន​លុកលុយ​ដោយ​ព្រះ​គ្រីស្ទ​ក្លែងក្លាយ ​និង​ដំណឹង​ល្អ​ក្លែងក្លាយ​របស់​ពួក​គេ។

និពន្ធដោយ៖ ចេ. ឌី. ក្រោលី